Jack Warner azidi kuchunguzwa.

Makamu wa Rais wa zamani wa Shirikisho la Kandanda duniani FIFA Jack Warner amekumbwa na kashfa ingine na uchunguzi dhidi yake kuhusiana na kupotea kwa fedha ambazo zililengwa kwa ajili ya kuwasaidia waathirika wa tetemeko la ardhi lililoikumba Haiti mwaka 2010.
Warner aliitembelea nchi hiyo miezi kadhaa baada ya tetemeko hilo a kuchangisha kiasi cha dola dola mia saba na elfu 50 kutoka FIFA na shirika la mpira wa miguu la Korea kusini kwa ajili ya kuijenga upya nchi hiyo.
Lakini hata hivyo, Wachunguzi wa kashfa hiyo rushwa inayoikabili FIFA wanasema fedha hizo zilihamishwa katika Akaunti inayodhibitiwa na Bwana Warner kwa ajili ya matumizi yake binafsi. Miaka minne baadaye fedha hizo bado hazijatolewa maelezo.Warner mwenyewe amekana tuhuma zote zilizotolewa dhidi yake.

Read More

Lewis Hamilton afurahia ushindi

Dereva wa mbio za magari ya Langalanga Lewis Hamilton, amekiri kuwa alihitaji ushindi kwenye mashindano ya Canadian Grand Prix baada ya kuibuka kidedea mara nne katika mashindano saba ya msimu huu.
Lewis hakufanikiwa kushinda katika mashindano yaliyopita yaliyofanyika Monaco kutokana na matatizo ya kiufundi yaliyoikumba gari lake. ''Sikuhitaji ushindi? Nafikiri nilihitaji" alisema Hamilton.
''Hakika tulipata tatizo ambalo lilimwezesha Nico kushinda mbio zile, lakini kwa ujumla nilikuwa na kasi nzuri kwa mashindano mawili ya mwisho kwahiyo hairidhishi, ni vizuri kuendelea na nguvu nzuri na inapendeza kuona timu ikiendelea kuwa na nguvu huku ikisonga mbele.

Hilo ndilo jambo la kuvutia zaidi" aliongeza mchezaji huyo.
Meneja mkuu wa Mercedes Toto Wolff, amesema timu yao imepitia katika wiki mbili ngumu kutokana na ukosoaji mkubwa walioupokea kutokana na makosa ya Monaco ambayo yamepelekea kufanya tathmini kuhusiana na maamuzi ya kiufundi ya mbio.

Read More

Google yamuorodhesha Modi kama muhalifu

Kampuni ya mtandao wa Google imeomba radhi baada ya picha za waziri mkuu wa India Narendra Modi kuonekana katika picha za watu kumi wahalifu.
''Tunaomba radhi kwa kuchanganyikiwa na kutoelewana ambako kumesababishwa na picha hizo'',taarifa iliotoka kwa kampuni hiyo ilisema.
Picha za Modi zinaonekana unapowatafuta watu 10 wahalifu pamoja na magaidi,wauaji na madikteta.

Viongozi wengine duniani waliomo katika orodha hiyo ni aliyekuwa rais wa Marekani George Bush na Libya Muammar Gaddafi.
Viongozi wengine wakuu wanaopatikana ni waziri mkuu wa Delhi Arvind Kejriwal,wakili Ram Jethmalani na mtoro Dawood Ibrahim pamoja na mwigizaji wa Bollywood Sanjay Dutt ambaye kwa sasa anahudumia kifungo kutokana na mlipuko mkubwa uliotokea mjini Mumbai mwaka 1993.
''Haya matokeo yanatushangaza na hayawakilishi maoni ya Google'',kampuni hiyo ilisema katika taarifa yake iliotolewa jumatano usiku.

Kampuni hiyo imesema kuwa matokeo hayo yanatokana na gazeti moja la Uingereza ambalo lilichapisha picha ya Modi kimakosa.
Msamaha huo unajiri baada ya wanasiasa wengi wa India kuonyesha wasiwasi wao katika mitandao ya kijamii.

Read More

Polisi asimamishwa kazi Marekani..

Polisi mmoja mzungu katika jimbo la Texas nchini Marekani amesimishwa kazi baada ya video moja kuwekwa kwenye mitandao ikionyesha akihangaisha kundi moja la vijana wengi wao wakiwa ni weusi.
Afisa hiyo anaonekana akiwalenga vijana wawili wa kiume kwa bunduki yake huku pia akimuangusha chini na kumkamata msichana wa umri wa miaka 14.
Polisi hao walikuwa wameitwa na wenyeji waliokuwa wakilalamikia kuwepo usumbufu kwenye kidimbwi kimoja cha kuogelea.

Mkuu wa polisi McKinney anasema kuwa, anachunguza tukio hilo ambalo linafanyika wakati kuna misukosuko baina ya jamii za watu weusi nchini Marekani wanaodai kunyanyaswa na polisi.

Read More

Nyuki avuruga safari ya ndege Uingereza

Abiria wa ndege moja ya shirika la ndege la Flybe linalohudumu nchini Uingereza walicheleweshwa kwa zaidi ya saa mbili baada ya wahandisi wa ndege hiyo kubaini kuwa nyuki alikuwa amepenyeza na kuingia ndani ya mitambo ya ndege hiyo na hivyo safari haingewezekana.
Ndege hiyo ya Flybe yenye namba ya usajili BE384 ilikuwa ikitoka Southampton kuelekea Dublin.
Wahandisi walilazimika kutafuta mbinu ya kumwdoa mdudu huyo.
Abiria mmoja aliyekuwa ndani ya ndege hiyo Noel Rooney, anasema hakuamini tukio hilo hasa kwani ndge hiyo imeitwa jina la nyuki!
Taarifa kutoka kwa shirika hilo lilisema kuwa nyuki huyo alikuwa ndani ya mitambo muhimu ambayo ingehatarisha maisha ya abiria wake.
''rubani wetu alitahadharishwa na kuwepo kwa nyuki na akalazimika kurejea maramoja katika uwanja wa ndege wa Southampton'.'

Nyuki huyo alikuwa ndani ya mitambo muhimu ambayo ingehatarisha maisha ya abiria wake.

Shirika hilo limewaomba radhi abiria wote waliokerwa na hatua ya kurejea kwa ndege hiyo.
Watu wengi waliitania ndege hiyo kufuatia ripoti hiyo kuenea kwenye mitandao ya kijamii.
Rooney aliandika kwenye ukurasa wake wa twitter kuwa ''nimebeba jaa ilikuhakikisha kuwa safari yangu ikamilike''

Read More

Burundi;Watoto Wakimbizi wanadhulumiwa

Shirika la kutoa misaada la Save the Children limesema kuwa zaidi ya watoto elfu mbili mia tatu 2,300 ambao hawana wazazi, wamekimbia machafuko ya kisiasa yanayoendelea nchini Burundi.
Shirika hilo limesema kuwa baadhi ya watoto hao walitembea kwa miguu kwa muda wa wiki moja hadi mataifa jirani ya Rwanda, Tanzania na Jamuhuri ya Kidemokrasia ya Congo.
Msemaji wa shirika hilo la Save the Children, Edwin Kuria,amesema idadi kubwa ya watoto hao walifika katika kambi za wakimbizi wakiwa hawana hata viatu na mali waliyokuwa nao ni mavazi tu waliokuwa nayo mwilini.

Tangu aprili mwaka huu watoto wengi kutoka Burundi wamekuwa wakitembea hadi kambi hizo za muda nchini Rwanda,Tanzania Uganda na DRC.
Shirika hilo limeonya kuwa idadi hiyo huenda ikaongezeka huku wengi wakitoroka Burundi wakihofia kuzuka kwa mapigano.
Taifa hilo linajianda kwa uchaguzi mkuu ambao awali ulipangiwa kuandaliwa mwezi huu.
Aidha shirika hilo limesema watoto hao wanakabiliwa na matatizo mengi njiani na wanapofika katika kambi hizo ambazo kwa sasa zimefurika usalama wao bado sio shwari.
Baadhi ya watoto hao wameripotiwa kunyanyaswa na kudhulumiwa na wakaazi wa maeneo hayo.

Watoto hao hawaendi shuleni na sasa jukumu lao kuu ni kukusanya kuni au kuchimba vyoo majukumu ambayo sio salama kwa watoto amesema bwana Kuria.
Katika kambi ya Mahama nchini Rwanda watoto hao wanakabiliwa na matatizo ya kupata maakazi ya kuishi na pia maji safi ya kutumia.
Nchini Tanzania katika kambi ya Nyarugusa, idadi ya watoto wanaogonjeka imeongezeka hasa kufuatia kufungwa kwa vituo viwili ya muda kutokana na mlipuko wa ugonjwa wa kipindupindu.

Read More

Jeshi la Nigeria lahamia Maiduguri

Makao makuu ya jeshi la kulinda usalama la Nigeria limehamisha kitovu cha operesheni ya kukabiliana na wapiganaji wa kundi la kiislamu la Boko Haram hadi mji wa Maiduguri.
Hatua hii inafuatia ahadi ya rais mpya wa Nigeria Muhammadu Buhari alipokuwa akiapishwa kuwa moja ya kauli mbiu ya utawala wake ni kukabiliana na Boko Haram.
Msemaji wa jeshi kanali Sani Usman amesema kuwa wanajeshi wakuu wote wamehamia huko ilikuendesha operesheni dhidi ya kundi hilo.
Mji huo ulioko kaskazini mwa taifa hilo tajiri zaidi barani Afrika kiuchumi umekuwa kitovu cha mapigano makali baina ya wapiganaji wa Boko haram na majeshi ya serikali.
Katika siku za hivi punde Maiduguri Imeshuhudia visa vingi mno vya mashambulizi ya kujitolea mhanga ambayo yamesababisha vifo vya watu zaidi ya 80.
Rais mpya aliyechaguliwa majuzi, Muhammadu Buhari, aliamuru kuhamishwa kwa kituo hicho hadi Maiduguri kutoka mji mkuu wa Abuja - mahala ambapo aliapishiwa mwishoni mwa mwezi uliopita.

Mwana habari wa BBC wa maswala ya usalama barani Afrika, amesema kuwa kumekuweko na lawama dhidi ya makamanda wakuu wa kijeshi kujitenga na hali ilivyo katika kikosi cha kwanza kinachopambana na Boko Haram.
Hali hiyo imechangia pakubwa kutokuwa na uwezo wa kufanya maamuzi ya busara.
Amesema kuwa uamuzi huo wa kuhamishiwa kwa kituo hicho kikuu hadi Maiduguri, kutasaidia pakubwa katika vita dhidi ya Boko Haram, kundi ambalo limesababisha maafa makubwa na hasara Nchini Nigeria.

Read More

Mguu bandia wenye hisia wazinduliwa

Watafiti katika chuo kikuu nchini Ausralia wamevumbua mguu wa kwanza bandia duniani wenye uwezo wa kusisimua hisia halisi za binadamu.
Mguu huo wenye tofauti chache mno na ule halisi unahisi hata maumizi.
Katika uvumbuzi huo wa Profesa Hubert Egger wa chuo kikuu cha Upper Austria, mguu huo bandia unatumia neva za mwili wa mtu aliyekatwa mguu wake.

Aidha neva za ncha za mguu wa mgonjwa hushikanishwa na waya zinazowasiliana na ubongo kupitia kwa paja.
Professor Egger anaelezea kuwa bwana mmoja mlemavu amekuwa akiuvaa mguu huo bandia kwa miezi sita.

Bwana Wolfgang Rangger alisema kuwa katika muda huo wa miezi sita anauwezo wa kubaini iwapo anakanyaga mawe, simiti,na hata nyasi.
''ninapo kanyaga jiwe,nahisi kitu kigumu na pia nikikanyaga mbao,pia najua kuwa kile nilichokanyaga ni tofauti.''
''Nimepata maisha mapya baada ya kupokea mguu bandia'' alisema Wolfgang Rangger.

Read More

Mtandao wa kijeshi Marekani wadukuliwa

Jeshi la Marekani lilisimamisha kwa muda mtandao wake baada ya kisa cha kuingiliwa kimitandao. Jeshi la Syria la Electroniki - linalomuunga mkono Rais Bashar al-Assad - limesema katika mtandao wake wa kijamii wa Twitter, kuwa ndilo lililotekeleza shambulizi hilo la kimitandao. Lakini habari za hivi punde zasema kuwa mtandao huo wa jeshi la Marekani umerejeshwa.

Read More

Mtandao wa kijeshi Marekani wadukuliwa

Jeshi la Marekani lilisimamisha kwa muda mtandao wake baada ya kisa cha kuingiliwa kimitandao. Jeshi la Syria la Electroniki - linalomuunga mkono Rais Bashar al-Assad - limesema katika mtandao wake wa kijamii wa Twitter, kuwa ndilo lililotekeleza shambulizi hilo la kimitandao. Lakini habari za hivi punde zasema kuwa mtandao huo wa jeshi la Marekani umerejeshwa.

Read More

Hong Hong yatoa tahadhari ya MERS.

Serikali ya Hong Kong imetoa tahadhari dhidi ya kusafiri kwenda nchini Korea Kusini, kufuatia kuwepo mlipuko wa homa ya Middle East Respiratory Syndrome ambayo pia inafahamika kama MERS nchini humo.
Onyo hilo linatolewa kwa safari ambazo si za lazima, ishara kuwa Hong Kong inaamini kwamba usafiri kwenda Korea kusini ni jambo ambalo ni hatari.
Wizara ya afya nchini Korea Kusini inasema kuwa watu 7 kwa sasa wameaga dunia kutokana ugonjwa huo.
Kumeripotiwa visa 8 vipya vya homa ya MERS na kufikisha idadi ya watu walioambukizwa kuwa 95.

Read More

G7 yatishia kuiongezea Urusi vikwazo.

Kansela wa Ujerumani Angela Merkel amesema kuwa, viongozi wa mataifa saba yenye uwezo mkubwa wa kiuchumi Duniani-G7, wamekubaliana kuwa vikwazo dhidi ya Urusi vinafaa kuendelea.
Bi Merkel amesema hadi pale muafaka wa kukomesha mapigano nchini Ukraine utakapoheshimiwa vikwazo sharti ziendelee.

Akiongea katika siku ya mwisho ya mkutano wa siku mbili, Merkel amesema kuwa mataifa ya G7 yalikuwa tayari kuzidishia Urusi vikwazo zaidi, iwapo hali ingeruhusu.
Kuhusu mzozo wa kifedha unaokumba Ugiriki, Bi Merkel, alionya kuwa muda uliosalia kabla makubaliano hayajatiwa sahihi ni mchache mno.

Alishauri Ugiriki kuchukua hatua madhubuti ilikunusuru sarafu ya taifa hilo.
Viongozi hao wanafanya mazungumzo katika siku ya pili ya mkutano mkuu, wenye nia ya kukabiliana na mabadiliko ya hali ya hewa, huku pia swala la kuongezeka kwa makundi yenye itikadi kali likijadiliwa.
Bi Merkel pia amewataka wanachama wa G7 kuchangia hazina ya kuyasaidia mataifa maskini ambayo yanaathirika na mabadiliko ya hali ya anga.

Viongozi kutoka Nigeria na Tunisia watahudhuria kikao maalum, kuhusiana na hatari iletwayo na makundi yenye itikadi kali hasa yale ya Afrika.
Kwa mara ya pili tangu mzozo huo na Ukrain utokee rais Putin wa Urusi hakualikwa kwenye kikao hicho licha ya Urusi kuwa mwanachama wa G7.

Read More

Boko haram yatoa video nyingine..

Wanamgambo wa kiislamu nchini Nigeria wametoa picha mpya za video lakini Kiongozi wa Boko Haram ambaye huwa anaonekana kwenye video zao, Abubakar Shekau hakuonekana kwenye picha hizo za video.
kutoonekana kwa Shekau kwenye Video hiyo kumeleta hali ya wasiwasi kuhusu kuwepo kwa hali ya mgawanyiko ndani ya kundi hilo.
Takriban watu 13 wameuawa siku ya jumanne katika shambulio la bomu katika Soko la Ng'ombe mjini Maiduguri, mji ambao uliwahi kuwa ngome ya Boko Haram, Kaskazini mashariki mwa Nigeria.
Katika picha ya video ya dakika 10, msemaji huyo amekanusha taarifa zilizotolewa na Jeshi la Serikali kuwa linadhibiti miji yote kutoka mikononi mwa wanamgambo.
Ameonyesha vitambulisho vya wanajeshi akisema kuwa wameuawa, na kuonyesha mabaki ambayo amedai ya ndege ya kijeshi waliyoidungua.
Msemaji aliyekuwa amebeba bunduki na huku uso wake ukiwa umefunikwa, amesema video hiyo ilirekodiwa sambisa, msitu unaozunguka hifadhi.
Rais wa Nigeria, Muhammadu Buhari,amesema kuwa vikosi vya kijeshi viko kwenye doria mjini Maiduguri na kuhakikisha kuwaondoa wanamgambo hao katika eneo hilo.
Baadae wiki hii, Buhari atakutana na Viongozi wenzie wa nchi jirani kwa ajili ya kuzungumzia mikakati ya kijeshi dhidi ya wanamgambo wa kiislamu.
Takriban watu milioni moja na nusu wamekimbia makazi yao, na mamia zaidi wametekwa tangu kuanza kwa harakati za kundi hilo mwaka 2009.
Zaidi ya Watu 15,500 wameuawa katika mapigano.

Read More

Mti wa Ebola nchini Guinea..

Kuna mti unaodaiwa kusababisha mlipuko wa Ebola nchini Guinea.Kundi moja la wavulana lilimpeleka mwandishi wa BBC katika mti huu.

Walielezea kwamba siku moja waliwasha moto katika mti huo na popo wakaanguka kutoka kwa mti huo.

Waliwajaza popo hao katika mifuko na kuwala.Wakati huo hakuna mtu ambaye alikuwa amewahi kufariki na mlipuko wa Ebola.

Read More

Sokwe hawajambo kwa upishi wa vyakula..

Wanasayansi kutoka Marekani wana imani kuwa sokwe wana uwezo na akili ya kupika chakula. Wanasayansi hao wamefanya baadhi ya majaribio ambayo yameonyesha kuwa sokwe wanaweza kupika mboga za majani na wana uwezo wa kuhimili kusubiri chakula cha moto.
Hata kama wanyama wengi wana desturi ya kula chochote wanachokipata na kula moja kwa moja. Watafiti kutoka chuo kikuu cha Harvard wanasema matokeo ya utafiti walioufanya unasema kuwa Sokwe wana uwezo wa kupika na inawezekana suala hili liligundulika muda mrefu uliopita.
Hivyo wanachokihitaji sokwe ni ujuzi wa upishi kwani imedhihirika kuwa wana uwezo wa kuhimili moto.

Read More

China:Meli haikuweza kuzuia upepo mkali..

Maafisa wa Uchina wanasema meli ndogo iliopatwa na ajali na kuzama katika mto Yangtse ikiwa na abiria zaidi ya 450 haikuwa na uwezo wa kuhimili dhoruba ya upepo mkali.
Meli hiyo iitwayo The Eastern Star ilizama dakika chache tu ilipokumbwa na upepo uliovuma kwa kasi usiku wa Jumatatu.
Miaka miwili iliyopita meli hiyo ilichunguzwa kwa madai ya kukiuka vigezo vya ubora na usalama.

Hata hivyo maafisa wanasema kuwa hawajakata tamaa ya kuwapata watu walionusurika ajali ya meli na vikosi vya uokoaji vinaendelea kuwatafuta walionaswa ndani ya meli hiyo kwa siku ya pili.
Watu saba wamethibitishwa kufariki huku watu kumi na tano wakiokolewa.

Read More

Kenya Airways yarudisha safari za S.Leone..

Shirika la ndege la Kenya limeanza tena kusafirisha wateja wake baina ya miji ya Nairobi na Freetown nchini Sierra Leone.
Ni shirika la kwanza kurejea nchini humo baada ya mlipuko wa ugonjwa wa Ebola kuzuka mwaka uliopita.
Idadi ya maambukizi inapungua na kumekuwa na watu 12 tu waliopata maradhi hayo katika wiki moja iliyopita.
Shirika la ndege la Ufaransa pia linatarajiwa kurejea nchini humo baadaye mwezi huu.

Read More

FIFA:Interpol yataka maafisa 6 kukamatwa...

Shirika la maafisa wa polisi wa kimataifa Interpol limetoa ilani ya kukamatwa kwa watu sita wanaohusishwa na FIFA kufuatia madai ya kuhusika na ufisadi.
Agizo hilo linawalenga maafisa wanne wa mashirika makuu pamoja na maafisa wawili wakuu wa zamani wa shirikisho la soka duniani FIFA akiwemo aliyekuwa makamu wa rais wa shirikisho hilo Jack Warner.
Sita hao tayari walikuwa wametajwa katika mashtaka yaliofunguliwa dhidi yao na mamlaka ya mahakama za Marekani wiki iliopita.
Ilani hiyo inawalenga watu wanaotafutwa kwa lengo la kuwakamata ili wasafirishwe hadi mataifa waliohusika na ufisadi huo ili washtakiwe ,lakini mataifa hayawezi kulazimishwa kumzuilia mtu yeyote aliyetajwa.

Read More

Mhudumu wa baa taabani kwa kifo cha mteja

Muhudumu mmoja wa baa amepatikana na hatia ya mauaji baada ya kumpa mteja wake jumla ya vipimo 56 vya pombe na kisha akafa.
Raia huyo wa Ufaransa alimpa Renaud Prudhomme, mwenye umri wa miaka 56, ''shoti'' 56 za mvinyo katika baa yake kwa nia ya kuvunja rekodi ya mywaji pombe nambari moja.
Marehemu Prudhomme, aliyekuwa ameandamana na binti yake kujiburudisha, alipelekwa nyumbani akiwa mlevi chakari.
Inaarifiwa kuwa alikimbizwa hospitalini ambapo alipatikana ameaga dunia siku iliyofuatia.
Hata hivyo mahakama ilimpata na hatia mhudumu huyo Gilles Crepin, mwenye umri wa miaka 47, kwa kumchochea marehemu Prudhomme aendelee kubugia mvinyo ilihali alikuwa mlevi kupindukia.
Mahakama ilisema kuwa Crepin aliendelea kuandika nani anayeshikilia rekodi hiyo kwenye ubao uliotundikwa hadharani kwa wateja wake.
Sasa Crepin amehukumiwa kifungo cha nyumbani cha miezi minne na kupigwa marufuku ya kufanya kazi katika baa yeyote kwa kipindi cha mwaka mmoja.
Wakili wake Renaud Portejoie tayari amesema kuwa atakata rufaa dhidi ya kauli hiyo ya mahakama.

"kauli hii haina hata chembe ya haki bali ni hisia tu zilizotumika hapa ,ninavyoona mimi hizi ni jitihada za amahakama kutoa hukumu ili iwe funzo''
Awali alikuwa ameiambia mahakama kuwa kifo cha Prudhomme hakikutokea kimsingi na kufuatia matukio ya mteja wake kwani marehemu alikuwa na maradhi ya kupumua mbali na kuwa mraibu wa tembo.
''kwa hakika hatuwezi kuwalazimisha wateja wote wa pombe kutoa ithibati kuwa wako katika hali nzuri ya afya''
Wakili wa mwanawe marehemu Antoine Portal, alisema kuwa familia yao imetulizwa na marufuku hiyo ya Crepin ya mwaka mmoja.
''Nilikuwa nataka tu kuwakumbusha wahudumu wa baa kuwa ni kinyume cha sheria kuendelea kumpa pombe mlevi''

Read More

Ujerumani ina idadi ndogo zaidi ya watoto duniani

Idadi ya watoto wanaozaliwa nchini Ujerumani imepungua zaidi ya mataifa yote duniani.
Utafiti umeonesha kuwa idadi ya watoto wanaozaliwa nchini Ujerumani ndiyo ya chini zaidi duniani na sasa kunahofu kuwa kupungua kwa uzazi kutaathiri pakubwa uwezo wa vijana kuendeleza kasi ya ukuaji wa uchumi wa taifa hilo tajiri zaidi barani Ulaya.
Watafiti wanaonya kuwa endapo jitihada mahsusi hazitafanywa ilikuimarisha idadi ya watoto nchini humo basi uchumi wa taifa hilo utaathirika vibaya.
Kulingana na utafiti huo,watoto 8.2 pekee walizaliwa miongoni mwa watu wazima 1000.
Awali idadi ya chini zaidi ilikuwa ya Japan ambayo huandikisha idadi ya watoto 8.4 wanaozaliwa miongoni mwa watu wazima 1000.

Kampuni ya uhasibu ya Ujerumani BDO ikishirikiana na chuo cha utafiti wa kiuchumi cha Hamburg Institute of International Economics (HWWI) ndiyo iliyoendesha utafiti huo kwa lengo la kutathmini uwezo wa uchumi wa taifa hilo kujiendesha mbali na viwango vya uzazi vinavyoripotiwa nchini humo.
Barani Ulaya, Ureno na Italia ziliorodheshwa katika nafasi ya tatu na nne zikiwa na jumla ya watoto 9.0 na 9.3 mtawalia.
Ufaransa na Uingereza zinasajili watoto 12.7 wanaozaliwa miongoni mwa watu wazima 1000.
Niger iliyoko Afrika ndiyo inayoandikisha idadi kubwa zaidi ya watoto wanaozaliwa duniani.
Nchini humo watoto 50 huzaliwa miongoni mwa watu wazima 1000.

Kulingana na utafiti huo wa BDO iwapo hali itaruhusiwa kuendelea hivyo basi idadi ya watu wenye umri wa kati ya miaka 20 na 65 wenye uwezo wa kufanya kazi na uwezo wa kuendesha uchumi wa taifa hilo itapungua kwa asilimia 61% hadi 54% ifikapo mwaka wa 2030.
Aidha afisa wa BDO Arno Probst, aliwatahadharisha wajerumani kuwa kiwango cha malipo na mishahara ya wafanyikazi kitaongezeka maradufu kadri ya upungufu wa watu wenye uwezo wa kufanya kazi .
Probst alisema Ujerumani italazimika kuwaruhusu wahamiaji kuingia nchini humo na kufanya kazi ilikuepuka kuzorota kwa uchumi wake.

Read More